***********
**صَدْمَةْ**
لْقِيتْ رَاسِي فَمَرْجَةْ…
وأنا الذكَرْ فَالجّْرَانْ
تَنْيَاقِي مَخَلاَنِي نَتْخَپَّا..
لاَزَمْ نَخْرَجْ نْبَانْ
نْبَيَّنْ صُولْتِي ونَكْشَفْ سَرْ اللَّعْبَةْ
غْرَسْتْ رَاسِي فْخَزَّةْ
وَغَرْغَرْتْ مَاهَا
رَمْقَتْنِي مَنْ لَعْلاَلِي حْدِيَّةْ…
وَخْداتْنِي مِنْ غَرْقْ النُّومْ
ْعشَاهَا اليُومْ مضْمُونْ …!!!!
ولاَّ عْقُوبْتِي لدارْ الدَّنْيَا
النَّكْدْ والعِيشْ المغْبُونْ..؟
***حلْمَةْ***
شَفْتْ غْمَامَةْ هربَانَةْ عَلْغْمَامْ
نقُولْ لَكْ توالْ القَبْلَةْ
نگُولْ مَنْها لْهِيهْ…
تلاَوْحَتْ بَذْخَلْها نَارْ مْهِيلَةْ
وغَادْيَةْ وتَزْنَدْ..
گَلْتْ هَاذِي غِيرْ شَمْسْ حْزِينَةْ.
اوْ شِي نَجْمَةْ صَطْحَاتْ مَشْهَابْ حَامِي..
وگالتْ نْعَكَّزْ بيهْ حتَّى إغْبَرْ سْوَادْ الحَالْ وندِيرُو مَرْوَدْ لَكْحَلْ لَعْيُونْ
باشْ مَا تْكُونْ الحَضْيَّةْ فَيُومُو حَرْفَةْ
فوَحْدَةْ مَنْ الغَفْلاَتْ
القَمَرْ صَيفَتْ لِي رَقَّاسْ
بلِّي هْلاَلُو جَايْ مْلَثَّمْ..
ونَاوِي يَقْرَا السَّلامْ علَى واحَدْ مِنْ لَخْدَمْ دْمُولاَنَا …
كَنْتْ نْطُوفْ بسَبْعْ نَخْلاَتْ
مْخَپَّي خُوفِي فتَخْرَاجْ العَيْنْ..
وجَنْبْ كلَّ نَخْلَةْ قْبَرْ
وكلَّ قْبَرْ محَوَّطْ بْلَحْجَرْ
وفكُلْ حَجْرَةْ سْمِيَّةْ
سْمِيْتِي أنَا… سْمِيْتَكْ أنْتَ…سْمِيَّتْ كُلْ مظْيُومْ…كُلْ مَهْمُومْ…
هاذا الصمتْ بعْصَاتُو
ونيابُواخَارْجِينْ …
الخُوفْ عْصَرْ لَرْضْ وتْبُوْعَات قطْرَانْ …
وأنا حوَّامْ بلا عقلْ مجنونْ
خْذَانِي حَالِي بالتَّاوِيلْ
تَمْتَمْتْ بَسَرَّابَةْ مَنْ لَكْلاَمْ …صُوتِي كانْ مَبْحُوحْ وعَالِي
وغْوَاتِي اللهْ العَلاَّمْ..
ما گديتْ نْشَدْ لرَضْ ما قْدَرْتْ نزيدْ القُدَامْ
بوغطاطُ شَرْشَمْ عْظامِي وسْحَبْ مَنِّي البْسَاطْ
تْمَنِّيتْ فْيَاقِي بَالْخَفْ،
بَاغِي نْتُوبْ مِنْ ذَنْبِي …
ونَشْعَلْ شَمْعَةْ نْضَوِي بِهَا دَرْبِي…
ونْخَلِي بصْمْتِي فَكْتَابْ أگْرَانِي ..
تْعَذَّرْ عْلِيَّ هاذْ الحَالْ
تْرَكَنْتْ فَقَلْبْ الحِيرَةْ مّلِّي قَلْ صَبْرِي …
كَانَتْ عِينِي بَّكَايَا…
وحلمِي مْسَلْسَلْ حْدَايَا..
وأرْضِي وبَحْرِي وَسْمَايَا خْرَافَةْ …
وأنا نْبَّحْلَگْ ونْشُوفْ..
الجَّهْدْ باشْ كُنْتْ نَتْعَنَّى
خَطْفَاتُوً خَطَّافَةْ
ودَرْعَتْ بِيهْ فَبْحَرْ صْعَابْ مُجَاتُو…
طَبْطْبَتْ عْلَى دْرَاعِي عْجُوزْ
قْيَاسْ الخِيرْ فصُورْتْ خْرَاجَةْ
مَا كَانْ عَادِي تْعَادِي…
حَاتْيَّةْ عْلَى كْتَابْ مَرْشُوشْ بَتْرَابْ الرُّوضَةْ…
وخانقَةْ تَحْتْ الطَّاپَگْ حمَامَةْ ..
ومنْ قْدَامْهَا كَانْ الدمْ إسِيلْ..
نَاوْلَتْنِي لَكْتَابْ وخَلْفَتْ بْلَضٌبَارْ….
وكِيفْ المَرْعُودْ خَلِيتْ وْرَاقُو للرِّيحْ تْصَفَّرْ…
هاذْ لكْتَابْ اليُومْ بِينْ إدِّي
خَايَفْ نقْرَاهْ
ويكُونْ سْبَابِي فْتَعْوَاجْ النَّظَرْ
خَايَفْ مِنْ التِّيهْ
خَايَفْ نَتَّجْلَى
وَنْوَلَّفْ لَخْلاَ
وتْوَلِّي دَرْبَالْتِي رَاسْ مَالِي
وعَكَازِي گَوَادْ
والمَنْوَالاَ يْعُودْ عْلِيَّ فْهِيمْ
خَايَفْ تْدُورْ الدُورَةْ وتجِي عْجَاجَةْ عَوْرا
وَ تَخْوِي لِفَتَّليسْ
و ًتْدُوزْ الحَمْلَةْ عْرَضْ منْ الوَادْ
وتَدِّينَا كَامْلِينْ….
ولِنْجَا وارجَعْ مْنِينَ جَا….
غادِي يْگُولْ الذكَرْ فالجْرَانْ هرَبْ مِنْ لَغدِيرةْ ورَاهْ يَضْرَبْ فَالزّْنَاتِي باشْ تَبْلاَ….
هاذْ الحَلْمَة يا سْيادِي الى كْتَابْ وتْحَقْقَاتْ
رَانِي بارِي مِنْ عِيشَةْ الجّْرانْ….
عبد اللطيف رعري
12/11/2023