شؤون ثقافية

قصيدة: حطّاب الجروح…!

قصيدة: حطّاب الجروح…!
 
قصيدة شعبية
 
شعر: مسلم الطعان
 
أظل أقرا إبصفنتك آنه صفنات
ما تكًدّر تصوّرها التصاوِير
 
وبفراش الجمر دلاّلك إيبات
يلْ إمخلّي الدِلالْ بجمرك إتحير
 
اعيونك لليضيفك موش نحسات
بصواني بيدَرَك زاد الزرازير
 
كريم وهذا طبعك موش بذات
ولا انته التدوّر عا لمعاذير
 
تشهكً ريّتكْ شبعان جويات
وباكًت نَسمِتَكْ ذيج النواطير
 
زمانك ضوّكًاك اشكثر لوعات
وانته انطيت إلهمْ دونْ تقصير
 
الدنيا بلا مَحَّبه نار غابات
ومن دخّانْها إتموت العصافير
 
يَا حطّابْ الجروح العمر لجمات
بنَزفك للخشبْ تحجي المسامير
 
اذا بستان عمرك يابس ايبات
تظل تنزف حزن دوم النواعير
 
عليك الماي يبجي بعينه دمعات
او كتاب الضيم ما يحتاج تفسير
 
يا إمعلِّم إوليدكْ عالصعوبات
وتريده زين يحفظها التعابير
 
الحكً الما ترّده الأهله جيلات
تدنكً راسْها إبذكره الشواجير…!
 
الجمعة الموافق/29/5/2020
الساعة الواحدة ظهرا
صومعة السومري الغريب في الكوفة
 

مقالات ذات صلة

زر الذهاب إلى الأعلى
إغلاق
إغلاق